Fitaccen Malamin addinin Musulunci, Sheikh Ahmad Gumi, ya ce a shirye ya ke tsaf ya yi zama da ƴan ta’addan da suka yi garkuwa da yara ƴan makaranta a garin Kuriga su 287 da kuma na Firamare LEA da ke ƙaramar Hukumar Chikun a Jihar Kaduna.
A cikin wata sanarwa da tawagar sa suka bayyanawa manema labarai sun ce Sheik Gumi ya bayyana aniyarsa na taimaka wa gwamnati wajen tattaunawa da ƴan bindigan don a sami damar kuɓutar da ɗaliban da aka sace.
Haka kuma Malammin ya nuna takaicin sa game da matakin da gwamnati ta ɗauka na ƙin zaman tattaunawa da ƴan bindiga.
Malamin ya ce tattaunawa da ƴan bindiga ita ce hanya mafi a’ala na samun damar sako waɗanda aka sace.
