Majalisar dattijai a karkashin jagorancin shugabanta, Sanata Godswill Akpabio, ta yafewa Sanata Abdul Ahmed Ningi tare da dawo da shi majalisa.
A ranar 12 ga watan Maris, 2024, majalisar dattijai ta dakatar da Sanata Abdul Ningi, mai wakiltar jihar Bauchi ta tsakiya, bayan ya yi zargin cewa an yi arangizon tiriliyan uku a kasafin kudin shekarar 2024.
Gidan talabijin na ‘Channels’ ya rawaito cewa Sanata Abba Moro na jam’iyyar PDP daga jihar Benue shine ya gabatar da kudirin neman majalisar ta yafewa Sanata Abdul Ningi.
Sanata Abba Moro, wanda ya samu goyon bayan wasu mambobin majalisar, ya bayyana cewa akwai bukatar Sanata Abdul Ningi ya dawo zauren majalisar domin cigaba da aikinsa na wakilci.
DUBA WANNAN: Dan majalisar wakilai daga jihar Abia ya Musulunta, ya sauya sunansa
Kazalika, Sanata Abba Moro ya bayyana takaici da nadama na abinda ya faru amadadin Sanata Abdul Ningi.
Da yake amincewa da kudurin Sanata Abba Moro, Sanata Akpabio ya bayyana cewa bukatar dawo da Sanata Abdul Ningi ta fi karfin batun kabilanci ko na banbanci addini.
Sanata Akpabio ya bayyana Abdul Ningi a matsayin mamba mai tasiri a zauren majalisar dattijai.
